Jæja, jæja, jæja!!  Er byrjuð aftur í átaki.  Þrátt fyrir að hafa gengið mjög vel á árinu 2009 og 2010 er ég komin aftur á byrjunarreit.  Eignaðist tvíbura seint á síðasta ári og hef gert lítið annað en að þyngjast síðan.  Hef aldrei verið jafnþung og ég er núna.  Mældi mig mánudaginn 25. maí og var 104,5 kg.  Hef aldrei áður farið yfir 100 kg þannig að þetta var mikið sjokk.  Samt ekki, þar sem ég fann þetta alveg á fötunum mínum sem voru farin að vera þrengri og þrengri eftir fæðinguna.

Ég hef enga afsökun, ég er bara búin að vera að borða mikið og óhollan mat.  Það er aðeins meira en að segja það að vera með tvíbura þannig að þegar þau voru sofnuð á kvöldin fannst mér alltaf að ég þurfti að vera að "verðlauna" mig með mat og tróð því í mig.  Vissi nákvæmlega hvað ég var að gera.  Síðan hef ég voða lítið verið að hreyfa mig.  Veðrið í vetur er bara búið að vera rugl.  Eins og ég hefði viljað fara út að labba er veðrið búið að vera hundleiðinlegt.

En ég ætla að hætta að væla um það hvað ég hefði getað gert og fara að gera eitthvað.  Er búin að vera að standa mig í rúmlega viku.  Mældi mig síðasta föstudag og var þá búin að missa tvö kíló og það var bara út af breyttu mataræði.  Nú er ég farin að hreyfa mig aftur og það vonast ég til að komast fljótlega undir 100 kílóin

Gengur ekkert allt of vel hjá mér.  Borðaði smá nammi í gær og í fyrradag.  Er samt búin að æfa ágætlega.  Skellti mér á vigtina í morgun og var búin að þyngjast um nokkur hundruð grömm

En það þýðir ekkert að gefast upp.  Er reyndar aldrei þessu vant að fara út að borða tvö kvöld í röð.  Er að fara að skella mér á tónleika í kvöld og svo í nudd og dekur á morgun.  Ohh, hvað þetta er erfitt líf

Eina leiðinlega við þetta er það að ég er að kvefast.  Þetta bregst ekki, alltaf þegar byrjar að hlýna í veðri þá kvefast ég.  Ætla því að sleppa æfingunni í kvöld og frekar slappa af fyrir kvöldið.  Vonandi verð ég síðan góð á morgun þannig að ég get notið þess að láta dekra við mig.

Jæja þá er ég frá og með deginum í dag byrjuð aftur.  Steig á vigtina í morgun eftir tæplega tveggja mánaða pásu og var mjög stressuð.  Hélt að ég væri komin í svona 85 kg en sem betur fer var hún aðeins betri við mig og sagði 81,7 kg.  Hélt að vigtin væri eitthvað biluð því ég finn að ég er búin að fitna og vakti því eiginmanninn og lét hann stíga á vigtina líka.  Þar sem hann mældist alveg eðlilegur trúi ég nú tölunni.

Málið er að ég er búin að vera í algjöru rugli með mataræðið mitt.  Stundum borðaði ég ekkert í kvöldmat og fékk mér í staðinn popp og nammi um kvöldið.  Mjög heilbrigt ég veit!!

Ég er reyndar búin að vera að hreyfa mig ágætlega síðustu mánuði.  Reyndar voðalega lítið heima við eins og venjulega.  Í staðinn fór ég að æfa íþrótt sem ég gerði þegar ég var ung og það er ferlega gaman.  Síðan er ég búin að vera að keppa á mótum og svona og gekk bara mjög vel.  Er líka búin að vera svakalega stressuð í tengslum við þessi mót.  Skil ekkert í mér að stressast svona mikið upp.  Ætla reyndar að halda áfram að æfa en taka mataræðið í gegn.  Líður ekkert vel þegar ég er að borða svona illa.  Langar svo mikið til að komast undir 80 kg aftur, mig langar nefnilega ekkert til að vera áttatíuogeitthvað lengur!!

Átti ekki von á því en ég náði mér undir 80 kg í morgun.  Vigtin sagði 79,7 kg sem er lækkun um 1,2 kg frá síðustu viku.  Gaman að vera komin aftur í sjötíuogeitthvað.

Nammidagur í dag og þá ætla ég að gera eitthvað sérstaklega skemmtilegt með fjölskyldunni.  Hlakka til

Fór í spinningtíma í gær og það var bara æðislegt.  Ekkert smá skemmtilegur tími og frábær tónlist.  Mér finnst það skipta svo miklu máli að það sé skemmtileg tónlist.  Finnst ekkert voðaleg gaman að vera í tíma þar sem er tónlist sem er eiginlega ekki tónlist, bara taktur.  Er eitthvað svo svakalega gamaldags með það.

Síðast þegar ég fór í spinningtíma var ég ca 17 kg þyngri og ég fann það alveg núna.  Var ekki að deyja eftir tímann eins og ég átti von á en þó var ég búin að taka mjög vel á því.  Á örugglega eftir að fara oftar í þessa tíma.  Eina sem ég hef yfir að kvarta eftir þetta en átti alveg von á því er það að ég er að drepast í rassinum